100 కోట్ల లాభం.. రైతు బిడ్డలకు..

 ప్రవీణ్ గారిది మహారాష్ట్రలోని పూణే జిల్లాలోని జతేద గ్రామం. ఎటు చూసినా పచ్చదనం, మట్టి వాసనలే పలకరించే ఆ ఊరి భూములను డబ్బులు ఆశ చూపించి కొంతమంది వ్యక్తులు కొనడం మొదలుపెట్టారు. ఎంత కష్టం వచ్చినా భూమిని అమ్ముకోకూడదు అనుకున్న తన తండ్రి లాంటి వాళ్ళు తప్ప తక్కిన వాళ్లంతా తమ భూములను కంపెనీలకు అమ్మేసుకున్నారు. ఆ డబ్బు ఖర్చయిపోయాక ఆ కంపెనీలలోనే సెక్యూరిటీ గార్డులు, వాచ్మెన్లుగా చేరారు. వాళ్ల పిల్లలకి ఆ దారీ లేక నేరాలు చేయడం మొదలుపెట్టారు. ఈ మార్పులన్నీ ప్రవీణ్ని ఎంతగా ప్రభావితం చేశాయంటే అతను లా, ఎంబీఏ చదువుకొని కార్పొరేట్ ఉద్యోగం చేస్తున్నా ,నేషనల్ కబడ్డీ ప్లేయర్గా రాణిస్తున్నా ,మనసంతా ఆ బతికి చెడిన రైతుల పైననే ఉండేది. దానితో ఉద్యోగం మానేసి యువతలో సామాజిక సమస్యల పైన అవగాహన తీసుకురావాలని థియేటర్ కళాకారుడిగా మారి నాటకాలు వేసేవాడు. నా దగ్గర ఒక మంచి రైతు కథ ఉంది వింటారా అంటూ సినిమా నిర్మాతల వెంటపడేవాడు వాళ్లేవరూ అతన్ని పట్టించుకోలేదు. కానీ ప్రవీణ్ లాగానే లా చేసి నాటకాల పైన ప్రేమను పెంచుకున్న స్నేహల్ అతన్ని ఇష్టపడింది. నీకంటే 12 ఏళ్లు పెద్దవాడు, పైసా సంపాదనలేదు ఏం పెట్టి పోషిస్తాడు అని పెద్దవాళ్ళు అన్నా వినిపించుకోకుండా ప్రవీణ్ నే పెళ్లి చేసుకుంది. పూణేలోని ఒక ఇరుకు ఇంటిలో ఉంటూ అతను నాటకాలు వేస్తుండగా, ఆమె ఉద్యోగం చేసి ఐదు సంవత్సరాల పాటు అతనికి అండగా ఉన్నది. నాటకాలు వేసుకుంటూ ఎంత కాలం భార్యపైన ఆధారపడతావు అనే చుట్టుపక్కల వాళ్ళ మాటలు, అప్పులు, తండ్రి తనతో మాట్లాడకపోవడం, సామాజిక సమస్యలను ఎవరూ పట్టించుకోకపోవడం వంటివి ప్రవీణ్ని  డిప్రెషన్ లోకి నెట్టేశాయి .దానితో ఒకరోజు అతడు ఆత్మహత్య ప్రయత్నం చేశాడు. కానీ ఆ ఫ్యాన్ చాలా పాతది కావడంతో విరిగి తన మీదే పడిపోయింది. తను చనిపోతే ఏ బాధ లేదు, కానీ కాళ్లు చేతులు విరిగితే తనను ప్రాణంలా ప్రేమించే భార్యకి ఇంకా భారం అవుతాను కదా అనుకొని ఆ ప్రయత్నం విరమించుకున్నాడు. ప్రవీణ్ నాస్తికుడు, అతని భార్య స్నేహల్ స్వామి సమర్థ భక్తురాలు. భక్తి , మూఢ భక్తి, సైన్స్ గురించి ఇద్దరు మధ్య చర్చలు జరిగేవి. ఆ నేపథ్యంలోనే మరాఠా సీరియల్ లకు మారుపేరుతో అతను డైలాగులు రాసేవాడు. వాటికి జనాలలో విపరీతమైన క్రేజ్ వచ్చింది .దానితో నెమ్మదిగా సినిమాలలో అవకాశాలు దక్కించుకున్నాడు. కాస్త పేరు, డబ్బు వచ్చాక అతను తీసిన మొదటి సినిమా దేవుల్ బంద్/ గుడి మూసేశారు. ఒక నాస్తిక సైంటిస్ట్ కి స్వామి సమర్థ భక్తులకి మధ్య నడిచే ఈ కథ సూపర్ హిట్ అయ్యి ఆర్థికంగా ప్రవీణ్ని నిలబెట్టింది. అప్పుడే దర్శకుడు, నిర్మాత, రచయిత అన్ని తానై ముల్షీ పాటర్న్ సినిమా తీశాడు. విదర్భ, మరాఠవాడ ప్రాంతాలలోని పేద రైతుల పిల్లలు నేర ప్రపంచంలోకి అడుగుపెడుతున్న తీరుని తెరకు ఎక్కించిన ఈ సినిమా సూపర్ డూపర్ హిట్ అయింది. మరోపక్క స్నేహల్ కూడా నటి, రచయిత్రి, దర్శకురాలుగా పేరు తెచ్చుకుంది. అలా ఈ దంపతులు తమ రంగాలలో రాణిస్తూనే వ్యవసాయంలో వచ్చే ఆధునిక మార్పులను రైతులు అందిపుచ్చుకునేలా వాళ్లకు వర్క్ షాపులు నిర్వహించేవారు. గ్రామీణ నటులకు శిక్షణ ఇచ్చి సినిమాలలో అవకాశాలని అందించేవారు .ఈ క్రమంలోనే స్నేహల్  ప్రధాన పాత్రలో ప్రవీణ్ దర్శకత్వంలో భక్తి, రైతు సమస్యల నేపథ్యంలో దేవుల్ బంద్ 2 సినిమాని తీశారు.  స్వామి సమర్థ భక్తుడైన కైలాష్ వాణి ఈ సినిమాని ఎనిమిది కోట్ల బడ్జెట్ తో నిర్మించారు. అంతా అయింది కానీ పోస్ట్ ప్రొడక్షన్ బిల్లు ఎక్కువ రావడంతో సినిమాను ఆపేయవలసిన పరిస్థితి వచ్చింది ప్రవీణ్ బృందానికి. ఈ సినిమా పోస్ట్ ప్రొడక్షన్ పనులను షారుక్ ఖాన్ గారికి చెందిన రెడ్ చిల్లీస్ ఎంటర్టైన్మెంట్ సంస్థ చూసింది  ఇది రైతుల కోసం నిర్మిస్తున్న సినిమా అని తెలుసుకున్న షారుక్ ఖాన్ గారు బిల్లులో పైసా కూడా తీసుకోలేదు. షారుఖ్ ఖాన్ చేసిన ఈ సహాయం ప్రవీణ్, కైలాష్ వాణిల పైన బలంగానే పడింది. అప్పుడే వాళ్ళు ఈ సినిమా పైన వచ్చిన లాభాన్ని ఒక్క రూపాయి కూడా ఉంచుకోకుండా ఖర్చులు పోను మిగిలిన డబ్బుని విదర్భ, మరాఠవాడ ప్రాంతాలలో ఆత్మ హత్యలు చేసుకున్న రైతుల పిల్లల చదువులకు, తల్లిదండ్రులు లేని పిల్లలను పోషించడానికి ఇవ్వాలనుకున్నారు .సినిమా విడుదలై 100 కోట్ల రూపాయలు కలెక్షన్స్ వసూలు చేసింది. అనుకున్నట్టుగానే ఆ డబ్బుని నానాపటేకర్ స్థాపించిన నామ్ ఫౌండేషన్, శివార్ సంసద్ లతోపాటు ఇతర ఎన్జీవోలకు అందించి తమ ఆశయాన్ని ఆచరణలో పెట్టి శభాష్ అనిపించుకున్నారు. 

శ్రీ ఎర్రబెల్లి రామ్ మోహన్ రావు గారు, వరంగల్

 వరంగల్ జిల్లా పర్వతగిరి మండలం కళ్యాణ గ్రామానికి చెందిన శ్రీ ఎర్రబెల్లి రామ్మోహన్ రావు గారికి ప్రకృతి ఎంతో మమకారం. తొమ్మిది ఎకరాల స్థలం లో చెట్టులు నాటి పచ్చని వనాన్ని సృష్టించారు. చుట్టూ ఉన్న కొండల నడుమ చెరువు తవ్వించి వర్షపు నీటిని ఒడిసిపడుతున్నారు .ఫలితం గా చెరువు పరిసరాల్లోనే రైతుల బావులు, బోర్లలో భూగర్భ జలాలు పెరిగాయి .దాంతో వారు నీటి సమస్యను అధిగమించి పంటలను పండించుకుంటున్నారు .అంతేకాదు అక్కడికి వచ్చే పక్షుల ఆహారం గురించి ఆలోచించిన రామ్మోహన్ రావు గారు చెరువులో చేపలను కూడా పెంచుతున్నారు .పక్షులు, జంతువులు, సమస్త జీవజాలంతో ఆ ప్రాంతం ప్రకృతి రమణీయ ప్రాంతంగా మారి పోయింది. ఇవే కాకుండా గ్రామ పరిధిలో సొంతంగా నాలుగు కుంటలను తవ్వించి లక్షల మొక్కలను నాటడం ఆ ప్రాంతం పచ్చగా మారిపోయింది. 

చదువుకున్న యువత సమాజానికి ఆదర్శం

 ప్రస్తుత కాలంలో యువత ఉద్యోగాలకే పరిమితం కాకుండా వ్యవసాయ రంగంలోనూ నూతన అవకాశాలు అన్వేషిస్తూ ముందుకు సాగుతోంది . ఇందుకు నిదర్శనం కామారెడ్డి జిల్లా బిక్కనూరు మండలం పెద్ద మల్లారెడ్డి గ్రామానికి చెందిన ఇద్దరు యువకుల ప్రస్థానం ఇలా కొనసాగింది. గ్రామానికి చెందిన జంగబోయిన రామచంద్రం, బుడ్డా ఆంజనేయులు ఇద్దరు చిన్ననాటి స్నేహితులు మష్రూమ్/ పుట్టగొడుగుల సాగును చేపట్టి ఆదర్శంగా నిలుస్తున్నారు. రామచంద్రము ఒక ప్రముఖ బహుళ జాతి సంస్థలో ఉద్యోగ బాధ్యతలు నిర్వహిస్తూనే మల్లు పల్లి గ్రామ శివారులో గల తన సొంత వ్యవసాయ క్షేత్రంలో పుట్టగొడుగుల పెంపకానికి శ్రీకారం చుట్టారు. ఆయన చిన్ననాటి స్నేహితుడు బుడ్డా ఆంజనేయులు ఉస్మానియా విశ్వ విద్యాలయం నుంచి ఎంకాం పూర్తి చేశారు. వ్యవసాయ రంగంపై ఆసక్తితో ప్రొఫెసర్ జయశంకర్ తెలంగాణ రాష్ట్ర వ్యవసాయ విశ్వవిద్యాలయం లో మష్రూమ్ సాగుపై ప్రత్యేక శిక్షణ పొందారు. శాస్త్రీయ పద్ధతుల్లో మష్రూమ్ సాగు చేయడం, ఉత్పత్తి నాణ్యతను పెంచడం, తీసుకోవాల్సిన జాగ్రత్తలపై అవగాహన పెంచుకున్నారు. ఇద్దరు స్నేహితులు తమ విద్య, వృత్తి అనుభవం, వ్యవసాయంపై ఉన్న ఆసక్తిని కలిపి గ్రామంలో ఉన్న జంగబోయిన రామచంద్రం వ్యవసాయ క్షేత్రంలో మష్రూమ్స్ సాగుకు శ్రీకారం చుట్టి అభివృద్ధి చేస్తున్నారు. సరైన శిక్షణ, శాస్త్రీయ పద్ధతులతో మంచి ఉపాధి అవకాశాలను సృష్టించుకోవచ్చని ఉద్దేశంతో ఈ కార్యక్రమానికి శ్రీకారం చుట్టినట్టు వారు తెలిపారు. ముఖ్యంగా ఉద్యోగాలు చేస్తున్న యువత, గ్రామీణ నిరుద్యోగులు, రైతులు వ్యవసాయాన్ని ఒక ప్రత్యామ్నాయ ఆదాయ మార్గంగా పరిగణించాలని వారు సూచిస్తున్నారు. ఆసక్తి ఉన్నవారికి మష్రూమ్ సాగుపై అవగాహన కల్పిస్తూ ఈ రంగంలో మరింత మందిని ప్రోత్సహించాలని ఆలోచనతో ఉన్నారు. ఎవరైనా మష్రూమ్ సాగుపై ఆసక్తి ఉన్నవారు తమను సంప్రదించాలని వారు తెలిపారు.ప్రస్తుతం తాము సాగు  చేసిన మష్రూమ్ 2 క్వింటాళ్ల వరకు వచ్చిందన్నారు. దీని విలువ మార్కెట్లో కిలో 650 రూపాయలు ఉంటుందని చెప్పారు. ఉద్యోగాలు చేస్తూ వ్యవసాయంపై ఉన్న ఆసక్తిని మరింత పెంచుకుంటున్నట్లు ఈ సందర్భంగా వారు వెల్లడించారు. 

జగిత్యాల మహిళా రైతు.. జాతీయ అవార్డు

 తక్కువ విస్తీర్ణం గల భూమిలో అధిక దిగుబడులు సాధిస్తున్న జగిత్యాల జిల్లా మహిళా రైతు కు జాతీయ స్థాయిలో మంచి గుర్తింపు లభించింది. 

సారంగాపూర్ మండలం పెంబట్ల గ్రామానికి చెందిన బండారి విజయ ప్రతిష్టాత్మకమైన మహిళా కిసాన్ దివస్ అవార్డుకు ఎంపికయ్యారు. ఒక ఎకరం విస్తీర్ణంలోనే 14 రకాల కూరగాయలను సాగు చేస్తూ , అంతర పంటల ద్వారా అదనపు ఆదాయం పొందుతూ విజయ సాధిస్తున్న తీరు ఆమెను ప్రత్యేకంగా నిలిపింది మహిళా రైతులను ప్రోత్సహించడం ,వ్యవసాయ రంగంలో వారు సాధిస్తున్న విజయాలను గుర్తించడం లక్ష్యంగా కేంద్ర వ్యవసాయ మంత్రిత్వ శాఖ ఏటా అక్టోబర్ 15 తేదీన " మహిళా కిసాన్ దివస్" ను నిర్వహిస్తూ అవార్డులను అందిస్తోంది. 

అన్నదాతల హెల్ప్ లైన్ 1800-180-1551

 భూసార పరీక్షలు చేయించాలనుకుంటే.. ఏ పంట వేయాలో నిర్ణయించాలనుకుంటే.. తెగులుకు పరిష్కారం కావాలనుకుంటే .. ఎరువుల గురించి.. వివిధ పథకాల గురించి .. ఇలా అన్నదాతల సమస్యలు, సందేహాలకు సమాధానం చెప్పేందుకు 1800-180-1551 టోల్ ఫ్రీ నంబర్ తో రాష్ట్ర వ్యవసాయ శాఖ కిసాన్ సహాయ కేంద్రం ను ప్రారంభించింది. 

ప్రతి రోజూ ఉదయం 6 గంటల నుంచి రాత్రి 10 గంటల వరకు దీని సేవలు రైతులకు లభిస్తాయి. రైతుల ప్రశ్నలకు నిపుణులు తెలుగులో జవాబిస్తారు. ఎరువుల యాప్ , పత్తి కొనుగోళ్లకు సంబంధించిన కిసాన్ కపాస్ యాప్ ల పై సాంకేతిక సందేహాల నివృత్తికి కూడా రైతులు ఈ నంబర్ ను వినియోగించుకోవచ్చు.

జాక్ ఫ్రూట్ తో జాక్పాట్

 పెరుగుతున్న ఖర్చులు ఒకవైపు ప్రతికూల వాతావరణ పరిస్థితులు మరొకవైపు సంప్రదాయ సాగు నుంచి ప్రత్యామ్నాయ పంటల వైపు రైతులను మళ్ళిస్తున్నాయి. హర్యానాలోని ఫరీదాబాద్ కు చెందిన ముఖేష్ అనే రైతు సైతం గతంలో వరి ,గోధుమ సాగు చేసేవారు. 

 ఇబ్బందులతో సతమతమై పనస సాగు చేయాలని నిర్ణయించుకున్నారు. తనకున్న రెండున్నర ఎకరాల భూమిలో సుమారు 35 పనస మొక్కలను నాటిన ముఖేష్ వీటి సాగుకు ప్రత్యేకంగా శిక్షణ కూడా తీసుకున్నారు. పూసా వ్యవసాయ విశ్వవిద్యాలయానికి వెళ్లి పనస సాగు గురించి తెలుసుకున్నాను, సాధారణ రకానికి బదులుగా ఏడాది పొడవునా కాపునిచ్చే పనస రకాన్ని నా పొలంలో నాటాను. ఐదేళ్ల క్రితం నాటిన మొక్కలు ఇప్పుడు ప్రతినెల క్వింటాళ్లకొద్దీ దిగుబడిని ఇస్తున్నాయి. ఏడాది పొడవునా ఆదాయం లభిస్తుంది అని ముఖేష్ వివరించారు. 

ట్రాక్టర్ల పేర్లే.. పిల్లల పేర్లు

 ఆయన రైతు. వ్యవసాయమంటే ప్రాణం. ఈ రంగంలో మరింతగా రాణించాలని ట్రాక్టర్ కొన్నారు. వ్యవసాయ పనులు అన్నీ ట్రాక్టర్ తో చేస్తూ మంచి దిగుబడులు సాధిస్తున్నారు. ట్రాక్టర్ తీసుకున్న నాటి నుంచి కుటుంబం ఆర్థికంగా నిలదొక్కుకుంది. దీంతో ఆయనకు ట్రాక్టర్ తో అనుబంధం బలపడింది. ఆ అభిమానంతో తన ముగ్గురు పిల్లలకు ట్రాక్టర్ల పేర్లే పెట్టుకున్నాడు ఆ రైతు. ఇది ట్రాక్టర్ పై ఆయనకున్న ప్రేమ తెలుపుతోంది. 

బీర్కూర్ మండలం బొమ్మన్ దేవన్ పల్లి గ్రామానికి చెందిన ఆకుల రాములుకు ముగ్గురు పిల్లలు. ఈ ముగ్గురు పిల్లలకు స్వరాజ్, మహీంద్రా, సోనాలికా అని ట్రాక్టర్ల పేర్లు పెట్టుకున్నాడు రాములు. అలా తన కుటుంబానికి ఆర్థిక బలాన్నిచ్చిన ట్రాక్టర్ల పై తన అభిమానాన్ని చాటుకున్నాడు. 

ఆలోచన ఇలా వచ్చింది..

రాములు 1993 లో స్వరాజ్ ట్రాక్టర్ కొనుగోలు చేశాడు.ఆయనకు 8 ఎకరాల భూమి ఉంది. ట్రాక్టర్ సాయంతో సాగు చేస్తూ మంచి దిగుబడులు సాధించాడు.ఆయన తన మొదటి కుమారుడి పేరు "స్వరాజ్" అని నామకరణం చేశాడు.  తర్వాత మహీంద్రా కంపెనీ ట్రాక్టర్ కొనుగోలు చేశాడు. తర్వాత ఆయనకు రెండో కుమారుడు పుట్టాడు. ఆ కుమారుడికి మహీంద్రా అని పేరు పెట్టాడు. ఆ తర్వాత సోనాలికా ట్రాక్టర్ కొనుగోలు చేశాడు. అపుడు కూతురు పుట్టింది. ఆమెకు సోనాలికా అని నామకరణం చేశాడు. పిల్లలందరూ చక్కగా చదువులో రాణిస్తున్నారు.

ఎన్నో ఏళ్లుగా ట్రాక్టర్ ఉపయోగిస్తున్నట్లు చెబుతూ , ఆ అభిమానంతోనే పిల్లలకు ట్రాక్టర్ల పేర్లు పెట్టుకున్నట్లు రాములు చెప్పారు. ట్రాక్టర్ తోనే పంటలు పండిస్తున్నానని, దుక్కి దున్నడం నుంచి పంట చేతికొచ్చే వరకు ట్రాక్టరే అన్ని రకాలుగా తనకు సహాయపడుతుందని , అందుకే ట్రాక్టర్ అంటే ఎంతో అభిమానం అని అంటాడు రాములు.